یازانمێرام آمان بییم، یوْلۇم بۇ غۆربته دۆشهن گۆندهن...
اؤنجه گۆنلهر، بیر نئچه سؤز یازێب پوْزدۇم، گتیرمیشدیم من اؤلکهمدهن
ایندیسه، سن دئ من یازێم، نهییم واردێ، ندهن یازێم
سحر ائرکن بئش یارێمدا، بیرجه کیچیک مینی بوسا مینیب، گئدیرهم ایشیمه
آخشام گینه قایێدێرام بئش یارێمدا
آرغێن-یوْرغۇن، هۆشسیز-یۇخۇسیز ...
گلیرهم ائوه، اوْدا منه آرتێق دارغێن، بیر دار اوْتاق، یوْخ بیر دار یاتاق ...
دا سۇسموشام، دا سوْلمۇشام، بیرجه قفهس ائو آدێدێر ..
چیخیب گزهم حاشا نئجه؟ هارا گئدهم؟ کیمه گئدهم؟ اۆرهگ سؤزۆن بۇ غۆربتده کیمه دییهم
بۇرا بۆتۆن غۆربت منه – آداملارێ آیری گلیر نظریمه
آغ دوْو بۇردا- جیرتدان تۇتۇب یئمهگینه دیش ایتیلدهن قارێ بۇردا
بۇردا ائشیدمیرهم آنا – بۇردا گؤرهنمیرهم آتا
بۇردا باجی – قارداش اؤلۆب، بۇردا بۆتۆن اینسان ایتیب...
بۇردا پارا-پولدی بیتیب
شاملایێبان، چوْخلۇ شامسێز تئز یاتێرام ...
من یاتێرام ...
گۆنۆز ایشه باش قاتێرام، گئجه باشێمێ یوْرغانا ... من یاتێرام
ایش دی یۇخۇ منیم ایشیم...
هاردا یازیم؟ نئجه یازیم؟ ندهن یازیم؟
بۇردا سؤزجۆگلهر اؤلۆبلهر، سؤز تاپێلمێر، نه سؤزجۆگه ایضاح وئریم؟، نه دئییمی آچێقلایێم؟
گؤزهل، مارال، آیدێن، آتا – آنا،باجێ، قارداش، بالا
بۇلار غۆربتده تاپێلماز، تاپیلسالاردا تئز سوْلار...
حایێف دگیل بۇردا اوْلار ...
من یاتێرام ...
یۇخۇ منه آیرێ دۆنیا، یۇخۇ منه اؤز یۇردۇمدۇر، یۇخۇ منه اؤز کندیمدیر
یۇخۇ منه آتا، آنا – یۇخۇ منه باجێ قارداش
یۇخۇ منه مین بؤلۆملی قالێن سؤزلۆگ
خان چوْباندێ، سارێ اینهک، سارا، آیدێن، جیرتدان بالا
اۇشاقلێقدێ یۇخۇ منه
بیرجه یۇخۇم، یۇخۇسێز اوْلمایێب منیم
یۇخۇ گؤرسهم، وطنسیز اوْلمایێب یۇخۇم
آخ یاتێرام، هئی یاتێرام، بۇ گۆز گۆنۆ کندیم نئجه دوْلانێرام:
چوْبان قارداش – اوْن سگگیز یاشدا بیر ایگیت، ایلک چوْبانلێق ایلیدی- پایێز دۇمانێ ایچینده
داغێدێب سۆرۆ داغ – داشا
یانچی باشدا، چوْبان چایێن ایچی داشدا
چؤرهک کسهن داغێن بۆتۆن، اتک باشا، سۆرۆ یایێب
گؤر نه یئییر، قمهر قوْیۇن آغ اوْت کاما، قیزیل قوْچۇ قوْیۇن دادا
کیرمان کئچی داغ – داش قاچا
دؤرد دؤیرهده هئزان ایتلهر، ایندی گلسه قۇرد نه ائدهر؟
دۇمان آرتێق چؤکۆر بتهر، گؤز گؤزۆ ایندیجه سئچهر!
آخێ دییهر آتا: قۇرتدا دۇمانلێغی گزهر
چوْبان قارداش آیێق اوْلا، ایندیجه قۇرتدا تئز گلهر
ایتلهر هۆردۆ، سۆرۆ هۆرکدۆ
کئچی برکدهن بع بغیردی، قۇرد پایێنێ آلێب گئتدی
چوْبان قاچێب هایا گلدی، ایتلهر باسدێ، یێغێشدیریب قۇردۇ تۇتجاق
کیرمان کئچی قۇرد الیندهن گؤر قۇرتۇلۇب نئجه قاچدێ، قوْیۇنلارێن ایچره قوْرخاق اؤزۆن باسدێ
قۇرد قۇتۇلۇب دۇردۇ قاچدێ...
سۆرۆ گینه اوْت اوْتلادێ...
تۇستۇ قالخدی، چایدان اوْد اۆسته فۆشخادێ، چای دملهنیب، سۆرۆ یاتماز
ایاق اۆسته نئچه بلگه، ساری یاغ شوْر قاتێب چوْبان
یئییب، ایتلهره یال آتێب، چایێن ایچیب گیرهوهنی آلێب یانچی
گلیب چؤرهگ یئییب ...
گینه آخشام سوْیۇق هاوا سۆرۆ گلیب کنده یئتیب
داوار گیریب کۆمده یاتێب ...
کند آدامی گئجه چاغێ ائو دوْلانێب
ناغێل دئییر آنالارێ، چای دملهییر باجێلارێ
بیر باخ بۇرا، سؤزجۆگ قوْشۇن قۇرۇب دۆشمۆش یوْلا
چوْخ دییهنی،یوْخ یێغانێ، سؤز یازانێ
گؤر نه هایدێ کند دؤیرهسی، قۇردلار باسێر کنده ساری
ایتلهر قۇرۇب داش دۇواری
من یاتێرام
بۇ یۇخۇدا دیری قالام، یاشایێشی اوْردا تاپام
من یاتێرام
من یاتماسام، اؤلهجهیم، وارلێغێم یۇخۇدا منیم
من یاتێرام
اهواز – 17-8-1387
